தமிழகத்தை நோக்கி படையெடுக்கும் பன்னாட்டு முதலீடுகள்

சென்னையில் முதலமைச்சர் ஜெயலலிதா முன்னிலையில் 12 நிறுவனங்களுடன் புரிந்துணர்வு ஒப்பந்தங்கள் கையெழுத்தானது. புதிய நிறுவனங்கள் தமிழகத்தில் எங்கெங்கு நிறுவப்படவுள்ளது என்பதன் விரிவான தகவல் பின்வருமாறு,

அமெரிக்காவின் பி.பி.ஜி நிறுவனமும் இந்தியாவின் ஹர்ஷா நிறுவனமும் இணைந்து காஞ்சிபுரம் மாவட்டத்தில் கண்ணாடி தயாரிக்கும் ஆலையை அமைக்கின்றன. 4100 கோடி ரூபாயில் அமையும் இந்த ஆலையில் 1850 பேருக்கு வேலைவாய்ப்பு கிடைக்கும்.

பி.ஜி.ஆர். எனெர்ஜி நிறுவனமும் புகழ் பெற்ற ஹிட்டாச்சி நிறுவனமும் இணைந்து காஞ்சிபுரம் மாவட்டம் நெற்குணப்பட்டில் டர்பைன், பாய்லர் தயாரிக்கும் ஆலையை அமைக்கின்றன. 2400 பேருக்கு வேலைவாய்ப்பு வழங்க உள்ள இந்த  ஆலை 2325 கோடி ரூபாய் முதலீட்டில் அமைக்கப்படுகிறது.

தமிழகத்தில் பிரபல முருகப்பா குழும நிறுவனம் வாகன உதிரிப்பாகங்களை உற்பத்தி செய்யும் ஆலையை திருவள்ளூர் மற்றும் காஞ்சிபுரம் மாவட்டங்களில் அமைக்கிறது. 500 கோடி ரூபாய் முதலீட்டில் அமையும் இவ்வாலைகள் 1130 பேருக்கு வேலை தரும்.

பன்னாட்டு நிறுவனமான ஆம்வே வீட்டு உபயோக பொருட்களை உற்பத்தி செய்யும் ஆலையை திண்டுக்கல் மாவட்டம் நிலக்கோட்டையில் அமைக்கிறது. 300 கோடி முதலீட்டில் அமையும் இவ்வாலைக்கு 475 பேருக்கு வேலை தரும்.

இந்தோராமா குழுமம் சிந்தட்டிக் பைபர் உற்பத்தி ஆலையை 4500 ரூபா முதலீட்டில் அமைக்கிறது. சென்னை எண்ணூர் மற்றும் கோவையில் அமையவுள்ள இவ்வலைகளில் 500 பேருக்கு வேலைவாய்ப்பு கிடைக்கவுள்ளது.

ஜவுளி தொழிற்பூங்கா கோவை அருகே அண்ணூரில் நிறுவப்படவுள்ளது.  3100 கோடி ரூபாயில் நிறுவப்படவுள்ள இந்த தொழிற்பூங்காவில் இன்னும் 7 ஆண்டுகளில் 25000 பேருக்கு  வேலைவாய்ப்பை தரும்.

TVS நிறுவனம் சென்னை ஒரகடம், கிருஷ்ணகிரி மாவட்டம் ஹோசூரில் உள்ள தனது ஆலைகளில் விரிவாக்கப்பணிகளை 700 கோடி செலவில்  செய்து 1300 பேருக்கு வேலை கொடுக்கவுள்ளது.

டென்மார்க் நாட்டின் டான்போஸ் நிறுவனம் காஞ்சிபுரம் மாவட்டம் ஒரகடத்தில் உள்ள ஆலையை 500 கோடி செலவில் விரிவாக்கம் செய்கிறது. தொழிற்சாலை இயந்திரங்களை தயாரிக்கும் இவ்வாலையில் மேலும் 1200  பேருக்கு வேலை கொடுக்கவுள்ளது.

நோக்கியா நிறுவனம் காஞ்சிபுரம் மாவட்டம் ஸ்ரீபெரும்புத்தூரில் உள்ள தனது ஆலையை 250 கோடி ரூபாயில் விரிவாக்கம் செய்து 500 பேருக்கு வேலை கொடுக்கவுள்ளது.

ஹுண்டாய் மகிழுந்து நிறுவனம் காஞ்சிபுரம் மாவட்டம் இருங்க்காட்டுக் கோட்டையில் அமைந்துள்ள தனது நிறுவனத்தை 4000 கோடி ரூபாயில் விரிவாக்கம் செய்து 500 பேருக்கு வேலை கிடைக்கவுள்ளது.